امممم من كم يوم قريت كلام لبلوقر تكلمت فيه عن ايش الاشياء الي تسعدك
كلامها وكلام البنات كان جدا جميل ومن وقتها وانا هالموضوع في بالي في كل لحظه ..
فعلا ايش الاشياء الي تسعدني !
لما جلست اتامل اكتشفت انه فيه اشياء كثير ما كنت منتبهه لها ومركزه على اشياء ثانيه ..
الحمد الله انا راضيه بشخصيتي واشوف انه فيها قناعه ورضا وفيني شكرا لربي اعجز اوصفه الحمد والشكر لك يارب الله يقدرني على حمده ..
دائما احاول اوفر امنياتي وحاجاتي الماديه و غيرها .. ابي الشنطه هذي و الهيلز هذا و ابي جسمي كذا و شعري كذا و اسافر لهنا وهناك ، احس هالاشياء تسعدني وفعلا ما اكذب عليكم تسعدني بس مجدر ما تصير وتنتهي ابدا اختار شي ثاني ..
بعكس اشياء ثانيه كثيييير تسعدني وتظل سعادتي فيها لمجرد بس ذكراها ...
سعادتي لما ادور مع حبيبي في السياره في احياء راقيه مع ايس كوفي من جافا او مرات شاورما وعصير كوكتيل من ٣٦٠ هههههه ونتفرج على البيوت الجميله ونجلس نعلق على هالبيوت لو انها لنا ايش راح نعدل عليها و هذا حلو وهذا لو يحط اشجار يصير احلا وهذا لونه بايخ وهالبيت لو شبابيكه كبار .. احب اتاملهم .. يالله احس في كل بيت له قصه واسرار .. كيف وصلو لهالمستوى ؟ كيف كانت بداياتهم ؟ واجهو مصاعب ولاا جاتهم بالساهل ! هل هم راضين عن نفسهم ..!
التمشيه هذي تعطيني روقان وطاقه عجيبه اكثر من لما نطلع لعشاء راقي في احسن المطاعم .. شايفين كيف السعاده تجي في اشياء ما نتوقعها !
سعادتي لما اجلس مع اخواني الصغار و نلعب ونرقص ونغني وكل فرق العمر ينمحي بيننا اتمنى لحظتها نظل كذا على طول .. محد يكبر ! .. احبهم بجد .. مجرد كتابة هالسطر كانت كفيله بتنزيل دموعي !!
سعادتي في امي و ابوي ..
لما نتكلم عن صفه فيني و تعلق امي انك طالعه على ابوك وقتها نظرة ابوي و ابتسامته في هذي اللحظه تاسرني !! سعاده في قلبي من نظرة الفخر الي شافني فيها تخليني اخذ عهد على نفسي مستحيل اخيب ظنه فيني .
لما كنت في المدرسه ويتاخر ابوي علي و اطلع اخر وحده من المدرسه اكون زعلانه منه .. يوديني على طول لبقاله و اشتري حلوياتي .. وقتها ارضا عليه ويعم السلام ههههههه بس هالسعاده للان احس فيها حتى بعد ١٤ سنه !
امي .. امممم ما ادري عجزت اكتب شي .. امي بختصار وجودها بحياتي هو السبب الي يخليني احس بهالسعاده كلها ..
اشياء كثير تخلينا سعيدين ...
مواقف بسيطه او طموحات كبيره ..
لما ارتب بيتي وانظفه احس بسعاده ..
لما اشوف بوتيك مميز واتخيل اسمي في يوم من الايام مكانه احس بسعاده تحركني اني اشتغل لهالطموح ..
جلسة صاحبات جمعتكم شخصيات جميله وسواليف حلوه .. احس بسعاده
لما امشي في السوبرماركت وانا عارفه انه ربي انعم علي و فضلني باني اقدر اخذ اي شي من على الرف وارميه في العربيه بدون ما اشيل هم سعره وكيف راح ادفع او حتى كيف انه جسمي بصحه وعافيه اقدر اكل كل ما اشتهي هذي سعاده ونعمه تكفي العمر كله ..
الحمد لله على كل حال ..
الحمد لله على كل حال ..
الحمد لله على كل حال ..
